Қазақстанда жаңа футбол стадиондары мен спорт кешендері салынады

"Әр облыс, аудан орталығында, Кенттер мен ауылдарда балалар футбол алаңдары пайда болуы тиіс. Бұл алдағы екі жылға арналған міндет. Оның орындалуын тексерейік. Тек осылай ғана біз бүкіл әлемде танымал, әлеуметтік, бұқаралық спортты жаңа деңгейге көтере аламыз. Балаларды, жастарды футболға тарта отырып, біз лудомания, есірткі мәселесін едәуір дәрежеде шеше аламыз", - деді Тоқаев.

Ол сондай-ақ кәсіпкерлерді клубтық футболды бизнес ретінде қарастыруға және оның коммерциялануына ықпал етуге шақырды.

"Клубтар тек облыстық бюджеттерге ғана сенбеуі керек, бүкіл әлемде болып жатқан сияқты, өз бетінше ақша табуды үйрену керек. Сондықтан кәсіпкерлерді клубтық футболды бизнес ретінде көруге шақырамын. Әлемдік тәжірибе көрсеткендей, жекешелендірусіз іс орнынан қозғалмайды. Егер клубтар жеке болса, онда олар шетелдік спортшыларды шақыру құқығына ие болады", - деп атап өтті президент.

Мемлекет басшысы сондай-ақ биыл Қазақстанда бірқатар спорт нысандарының: Астанадағы Ұлттық спорт университетінің, Түркістандағы ескек есу каналының, Қызылордадағы футбол стадионының, Жетісудағы дене шынықтыру-сауықтыру кешенінің, Оралдағы ерекше қажеттіліктері бар адамдарға арналған спорт кешенінің құрылысы аяқталатынын айтты.

Сонымен қатар, Көкшетауда бірегей көпфункционалды спорт кешенінің құрылысы басталады. Оны қаржыландыру үшін үкімет заңсыз шығарылған активтерді қайтару есебінен толықтырылатын арнаулы мемлекеттік қордан қаражатты пайдалану мүмкіндігін қарайды.

"Жалпы, үш жыл ішінде елге екі триллион теңгеден асатын активтер қайтарылды. Бұл қаражат өңірлердегі өзекті экономикалық және әлеуметтік міндеттерді шешуге жұмсалатыны аса маңызды", - деді Тоқаев.