Қазақстандық авиакомпаниялар пауэрбанктерді ұшақтарда тасымалдау ережелерін қатаңдатты

Фото: Air Astana

14 Наурыз, 202521:05

«BaigeNews.kz»

Енді литий батареяларын тасымалдау қатаңырақ болады. 2025 жылғы 13 наурыздан бастап Air Astana авиакомпаниясы ұшу қауіпсіздігін арттыру үшін литий батареялары мен оларды қамтитын құрылғылардың тасымалдануына күшейтілген бақылау шараларын енгізеді, деп хабарлайды BaigeNews.kz.

Жаңартылған ережелерге сәйкес, қосалқы батареяларды, соның ішінде сыртқы батареяларды (қуат банктерін) және электронды темекі шегуге арналған құрылғыларды тек қол жүгімен тасымалдауға рұқсат етіледі.

Егер қол жүгін багажға тапсыру керек болса, жолаушы одан барлық қосалқы батареяларды алдын ала алып тастауы керек.

"Қолданыстағы ережелер батареялардың сыйымдылығы 100 Вт-тан аспауын талап етеді. 100-ден 160 Вт-қа дейінгі батареяларды тасымалдауға авиакомпанияның алдын ала мақұлдауымен ғана рұқсат етіледі, бұл ретте олардың саны бір жолаушыға екіден аспауға тиіс. Сыйымдылығы 160 Вт-тан жоғары батареяларды тасымалдауға тыйым салынады. Батареялардың сыйымдылығы тексеруге жатады, ал оларды таңбалаусыз немесе тиісті сертификатсыз тасымалдауға жол берілмейді", - делінген хабарламада.

Ұшу қауіпсіздігі үшін литий батареялары, сыртқы батареялар және темекі шегуге арналған электронды құрылғылар қол жүгінде болуы және ұшақ салонындағы багаж сөрелеріне орналастырылуы керек. Басқа құрылғыларды зарядтау үшін батареяларды пайдалануға, сондай-ақ борттағы батареяларды зарядтауға қатаң тыйым салынады.

Бұл шаралар ұшу кезінде литий батареяларының қызып кетуіне немесе өртенуіне байланысты ықтимал оқиғалардың алдын алуға бағытталған.

Авиакомпания өкілдері бұл жаңа ережелерді сақтау 2025 жылдың 13 наурызынан бастап барлық жолаушылар үшін міндетті екенін еске салды.