Бектенов әлеуметтік көмекті жақсарту үшін азаматтардың әл ауқатын талдауды аяқтауды тапсырды

Еңбек және халықты әлеуметтік қорғау министрі Светлана Жақыпова цифрлық шешімдерге негізделген жаңа тәсілдерді ұсынды, бұл қолдау шараларының қайталануын болдырмауға және "әлеуметтік әділеттілік"қағидатына сәйкес әлеуметтік игіліктерді бөлу тиімділігін арттыруға мүмкіндік береді.

Наурыз айындағы жағдай бойынша Қазақстанда 4 миллионнан астам азамат атаулы көмек, көп балалы отбасыларға төлемдер, Мүгедектігі бойынша жәрдемақылар, босанғанға дейінгі және босанғаннан кейінгі төлемдер, аз қамтылғандарды қолдауды қоса алғанда, түрлі әлеуметтік қолдау шараларымен қамтылған. "Отбасының цифрлық картасы" деректерін талдау 564 мың азаматтың ғана өмірлік қиын жағдайға тап болған санаттарға жататынын көрсетеді. Осыған байланысты әлеуметтік көмек көрсетудің категориялық қағидатынан нақты мұқтаждық өлшемдеріне көшуге бағытталған тетік қаралды.

Сондай-ақ мұқтаж азаматтарды қамтудағы өңірлік диспропорциялар проблемасын шешу мәселесіне назар аударылды. Атап айтқанда, өңірлер мен қалаларға қарамастан төлемдердің түрлері мен санын біріздендіру жөніндегі идеялар айтылды.

Олжас Бектенов Үкімет жұмысының басымдығы мұқтаж азаматтарды одан әрі өмір сүру деңгейі қанағаттанарлық санатқа көшу үшін қолдау шараларымен қамту болып табылатынын атап өтті. Ол үшін Еңбек және халықты әлеуметтік қорғау, цифрлық даму министрліктеріне жақын арада мұқтаждық деңгейін бағалау үшін әл-ауқатты егжей-тегжейлі талдау жөніндегі жұмыстарды аяқтау тапсырылды. Мұқтаждар жүйесінде көрінбейтін азаматтар бойынша жеке жұмыс жүргізу тапсырылды.