Қызғалдақтарды жұлып алу қылмыстық жауапкершілікке тартылады – ҚР Экология министрлігі

Фото: Мақсат Шағырбаев / Kazinform

14 Наурыз, 202514:35

«Казинформ»

Экологиялық тәрбиенің төмен деңгейіне байланысты мектептерде түсіндіру жұмыстары жүргізілуде. Бұл туралы ҚР Экология және табиғи ресурстар министрлігі Орман шаруашылығы және жануарлар дүниесі комитетінің төрағасы Данияр Тұрғамбаев Орталық Коммуникациялар Қызметінің баспасөз конференциясында мәлімдеді, деп хабарлайды kazinform агенттігінің тілшісі.

"Бізде экологиялық тәрбие деңгейі төмен. Сондықтан біз мектептермен бірлесіп жұмыс істейміз. Наурыз айында "Саябақтар шеруі"акциясы басталады. Осы акция аясында біз әр мектепке барып, экологиялық білім беру жұмыстарын жүргізуді жоспарлап отырмыз. Біз Қызыл кітапқа қандай өсімдіктер мен жануарлар кіретінін, олармен не істеуге болатынын және не істеуге болмайтынын түсіндіретін боламыз", – деді Д.Тұрғамбаев.

Тақырып бойынша сілтемелерКеше, 13:34Қазақстанда қандай жаңа ерекше қорғалатын табиғи аумақтар пайда болады

Оның айтуынша, өткен жылы Алматы, Түркістан және Жетісу облыстарында қызғалдақтардың жыртылу жағдайлары байқалған.

"Бірақ қызғалдақтар Қызыл кітапқа енгізілгендіктен, бірінші кезекте қылмыстық жауапкершілікке тартылады. Бұл біздің құзыретімізге кірмейді. Құқық бұзушылық жасаған адамдарға қатысты ішкі істер органдары тарапынан қылмыстық істер қозғалады", – деп түсіндірді Д.Тұрғамбаев.