Мәжіліс қылмыстық кірістерді заңдастыруға және терроризмді қаржыландыруға қарсы іс-қимыл жөніндегі түзетулерді ратификациялады

Жаңартылған келісімде мақсаттар мен міндеттерді нақтылау, Еуразиялық Топтың бюджетін қалыптастыру және орындау тәртібін өзгерту, сондай-ақ ақшаны жылыстатуға қарсы күрес жөніндегі ұсынымдарға сәйкес ұғымдық аппаратты өзектендіру ұсынылады.

"Хаттамамен Келісімнің мәтіні "жаппай қырып-жою қаруын таратуды қаржыландыру"деген сөздермен толықтырылады. Бұдан басқа, хаттамада ЕАТ бюджетін қалыптастыру көздері нақтыланады, сондай – ақ басқа да техникалық түзетулер енгізілді", - деді Қаржы мониторингі агенттігі төрағасының орынбасары Жеңіс Елемесов.

Ол ЕАТ-қа мүше тоғыз мемлекеттің жетеуі хаттаманы ратификациялағанын айтты. Қазіргі уақытта Қазақстан мен Қытай ратификациялау бойынша мемлекетішілік рәсімдерді жүргізуде.

Қылмыстық кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топты (ЕАТ) 2004 жылы Беларусь, Қазақстан, Қытай, Қырғызстан, Ресей және Тәжікстан құрды. 2011 жылдан бастап Түрікменстан, Өзбекстан және Үндістан қосылды.