Қазақстанда Tasqyn су тасқынын болжау жүйесі іске қосылды

Бүгінгі таңда өзендердің 128 учаскесіндегі 142 гидропост бойынша су тасқынын модельдеу жүргізілуде. "Қазсушар" бассейндік инспекциялары мен филиалдарының 114 маманы гидропосттар бойынша деректерге күнделікті мониторинг жүргізеді және оларды жүйеге енгізеді. 

Tasqyn жүйесі жаһандық GloFAS су тасқыны туралы ескерту жүйесіне біріктірілген. Tasqyn 2025 жылдың су тасқыны кезеңіне соңғы болжамды наурыз айының басында береді.

Су ресурстары және ирригация министрі Нұржан Нұржігітов су тасқыны кезеңіне дайындық мәселелері бойынша аппараттық кеңес өткізді.

"Ел ішіндегі су тасқынына дайындықтан басқа, біз көрші мемлекеттердің әріптестерімен де тұрақты байланыста боламыз. Ақпарат алмасу жедел жүргізілуде. Көктемгі су тасқынын қабылдауға арналған бос ыдыстарды қамтамасыз ету үшін су қоймаларынан су ағызу жалғасуда. Бүгінгі таңда су қоймалары 13 млрд текше метр суды қабылдай алады", - деді су ресурстары және ирригация министрі Нұржан Нұржігітов.

Естеріңізге сала кетейік, өткен жылы көктемгі су тасқынынан кейін Мемлекет басшысы ҚР цифрлық даму, инновациялар және аэроғарыш өнеркәсібі министрлігінің алдына ғарыштық мониторинг жүргізу арқылы су тасқынын болжауға арналған отандық ақпараттық жүйені әзірлеу міндетін қойған болатын.

Жүйе төрт кезеңнен тұрады: деректерді жинау, талдау, болжау және модельдеу.