Армия-2025: Қорғаныс министрлігі әскерге шақырылушылардың санын атады және маңызды ескерту жасады

13 ақпан қарсаңында Қасым-Жомарт Тоқаев "әскери қызметтің белгіленген мерзімін өткерген мерзімді әскери қызметтегі әскери қызметшілерді запасқа шығару және Қазақстан Республикасының азаматтарын 2025 жылғы наурыз – маусым және қыркүйек – желтоқсанда кезекті мерзімді әскери қызметке шақыру туралы"Жарлыққа қол қойды.

Жарлық "Қарулы Күштерге, ішкі істер министрлігіне, төтенше жағдайлар министрлігіне, Ұлттық қауіпсіздік комитетіне, Қазақстан Республикасының Мемлекеттік күзет қызметіне әскерге шақыруды кейінге қалдыруға немесе босатуға құқығы жоқ 18-27 жас аралығындағы ер азаматтарды мерзімді әскери қызметке шақыруға"ҚАУЛЫ ЕТЕДІ.

"2025 жылы әскерге шақыру жасындағы 42 мыңнан астам азамат шақырылуға жатады. Әскерге шақырылушыларды хабардар ету шақыру қағаздары мен SMS-хабарламалар арқылы жүзеге асырылатын болады. Хабарламаны алған кезде әскерге шақырылушылар медициналық комиссиядан өту үшін тұрғылықты жері бойынша жергілікті әскери басқару органдарына келуге міндетті. Ол әскерге шақырылушының мерзімді қызмет өткеруге жарамдылық дәрежесін анықтайды",-деп нақтылады бүгін ҚР ҚМ баспасөз қызметі.

Қорғаныс ведомствосы әскери қызмет өткерудің барлық кезеңінде сарбаздар тамақпен, заттай мүлікпен, жеке гигиена құралдарымен және ай сайынғы ақшалай үлеспен қамтамасыз етілетінін атап өтті. Оларға медициналық қызметтер көрсетіледі және пошта жөнелтілімдері үшін өтемақы төленеді.

Сондай-ақ, Қорғаныс министрлігі мерзімді қызметтің әскери қызметшілері үшін мынадай жеңілдіктер заңнамалық түрде бекітілгенін атап өтті:

- мерзімді қызмет өткерудің барлық уақытына және запасқа шығарылғаннан кейін 60 күнге кредиттік демалыс,

- Ұлттық бірыңғай тестілеуді тапсырусыз еліміздің жоғары оқу орындарында тегін немесе ақылы негізде жоғары білім алу мүмкіндігі,

- экономиканың нақты секторында талап етілетін жұмыс мамандығы бойынша мемлекеттік үлгідегі куәлік алу,

- запасқа шығарылғаннан кейін жұмысқа орналасу мүмкіндігі.

"Мерзімді әскери қызметке шақырудан жалтарғаны үшін қолданыстағы заңнамада әкімшілік және қылмыстық жауапкершілік көзделген", – деп еске салды ҚР ҚМ баспасөз қызметі.