Қазақстанда 2025 жылы қандай трассалар ақылы болады

Бүгінгі таңда елімізде жалпы ұзындығы 3,2 мың шақырым болатын 17 ақылы учаске жұмыс істейді. Ақылы жолдар желісін одан әрі дамыту шеңберінде 2025 жылы жалпы ұзындығы 2,2 мың шақырым болатын тағы 10 учаске қосу жоспарлануда.

"Мысалы, "Балқаш – Бурылбайтал" (91 км) автожолында жеңіл және жүк автомобильдерінен ақы алынатын болады. "Ақтөбе – Орынбор" (83 км), "Қостанай – Троицк" (163 км), "Қызылорда – Арал" (455 км), "Ақтау – Бейнеу" (454 км), "Қостанай – Денисовка" (169 км), "Үшарал – Достық"сияқты учаскелерде (180 км), "Қандыағаш – Мақат" (385 км), "Тараз қаласын айналып өту" (57 км) және "Шу – Бурылбайтал" (184 км) тек жүк автомобильдерінен ақы алынатын болады", - делінген министрліктің жауабында.

Ведомствоның ақпаратына сәйкес, 2025 жылы еліміздегі ақылы жолдардағы тарифтерді орта есеппен 30% - ға арттыру жоспарлануда. Тарифтерді көтеруден алынған қаражат жолдарды күтіп ұстауды жақсартуға, жаңа жол техникасын сатып алуға және автожол инфрақұрылымының нормативтік жай-күйін қолдауға бағытталатын болады.

Жергілікті тұрғындарды қолдау үшін 15% - ға дейін жеңілдіктер, абонементтерді сатып алу мүмкіндігі, сондай-ақ тұрақты жолаушылар тасымалын жүзеге асыратын автобустар үшін төлемнен толық босату қарастырылған. Жол жабыны зақымдалған учаскелерде жөндеу жұмыстары аяқталғанға дейін ақы алынбайды. Тарифтерді арттыру қозғалыс қауіпсіздігін арттыруға, жолдардың сапасын жақсартуға және елдің автожол инфрақұрылымын одан әрі дамытуға бағытталған. Бұл шаралар бірінші кезекте транзиттік көлік құралдарына қатысты, министрлік атап өткендей, ақылы жолдардың тұрақты дамуын қамтамасыз етеді.