Қытайдан Қазақстанға туристер ағыны үш есеге артып 650 мың адамнан асты

Кездесуде тараптар екі ел арасындағы Туризм және спорт саласындағы ынтымақтастық жоғары деңгейде дамып келе жатқанын атап өтті. Өткен жылы қазақстандық және қытайлық спортшылар бір-бірінің аумағында өтетін маңызды жарыстарға қатысты. Қазақстандық спортшылар Қытайда ұйымдастырылған 31 спорттық іс – шараға, ал қытайлық спортшылар Қазақстанда өткен 15 жарысқа қатысты. Сондай-ақ, туризм саласы екіжақты өзара іс-қимылдың маңызды бағыты болып қала береді. Соңғы жылдары қытай туристері арасында Алматы, Астана, Түркістан және Ақтау сияқты қалалардың танымалдығы артып келеді. Екі ел арасында визасыз режимді енгізу, тікелей авиарейстер санының артуы және Қазақстанның туристік әлеуетін белсенді ілгерілету саладағы көрсеткіштердің айтарлықтай өсуіне ықпал етті.

 

 

"Мемлекет басшысының тапсырмасы бойынша өткен жылы "Қазақстанның Қытайдағы туризм жылы"ұйымдастырылды. Елдің туристік әлеуетін ашу мақсатында Қытайдың ірі қалаларында роуд-шоулар, форумдар, көрмелер, концерттер және басқа да іс-шараларды қоса алғанда, 30-дан астам іс-шаралар өткізілді. Өткен жылы атқарылған жұмыстардың нәтижесінде Қытайдан Қазақстанға туристер ағыны 2023 жылғы көрсеткіштермен салыстырғанда үш есеге ұлғайып, 650 мың адамнан асты. Бұл қытай азаматтарының біздің мәдениетімізге, тарихымызға және табиғи көрікті жерлерімізге деген жоғары қызығушылығын білдіреді", - деп атап өтті Ербол Мырзабосынов.