Қазақстанда зейнетақы жарналарының бір түрі жойылуы мүмкін

Фото ©️ Tengrinews.kz / Тұрар Қазанғапов

28 Қаңтар, 202517:50

Tengrinews

Қазақстанда жұмыс берушінің міндетті зейнетақы жарналары (МЗЖ) жойылуы мүмкін. Бұл туралы вице-премьер, Ұлттық экономика министрі Серік Жұманғарин мәлімдеді, деп хабарлайды Тілші Tengrinews.kz.

Президенттің қатысуымен өткен Үкіметтің кеңейтілген отырысында Қазақстанда қосылған құн салығының (ҚҚС) мөлшерлемесін көтеру туралы ұсыныс айтылды, бұл Жұманғариннің айтуынша, бизнес үшін белгілі бір шығындарға әкеп соғады.

"Біз еңбекақы төлеу қорына ең жоғары жүктемелердің бірі бар екеніне назар аударғымыз келеді. Бұл жерде біздің экономикамыздың ең үлкен проблемасы жатыр. Бизнес төлейтін еңбекақы қорына жүктеме шамамен 40 пайызды құрайды. Ал бұл тауардың өзіндік құны", - деді Серік Жұманғарин.

Шенеуніктің айтуынша, бұл өнімнің өзіндік құнының жоғарылауына және оның өзі бәсекеге қабілетсіз болуына әкеледі.

"Осыған байланысты, ҚҚС мөлшерлемесі жоспарланған деңгейге дейін ұлғайған жағдайда, біз әлеуметтік салықты және жұмыс берушінің міндетті зейнетақы жарналарын жою есебінен еңбекақы төлеу қорына жүктемені орта есеппен 10-нан 30 пайызға дейін айтарлықтай төмендетуге дайынбыз. Бұл шығындарды бюджет өз мойнына ала алады", - деді Жұманғарин.

Оның айтуынша, Үкімет әлеуметтік салық жергілікті бюджеттердің негізгі кірісі екенін түсінеді.

"Республикалық бюджеттен жергілікті бюджеттерге салықтардың басқа түрлерін қайта бөлу бойынша нұсқалар пысықталуда. Біз олардың орнын толтыруға дайынбыз. Болашақ кірістер бұған мүмкіндік береді. Нәтижесінде Қазақстанның салық жүйесі қайта теңгеріледі",-деп толықтырды вице-премьер.

Тақырып бойынша сілтемелер28 ҚаңтарҚазақстандық IT-өнімдер 6 елге экспортқа шығады-ҚР Премьер-Министрі