Көлік полицейлері Қазақстанда 80 мыңнан астам құқық бұзушыны анықтады

"Өздеріңіз білетіндей, ішкі істер министрлігі заң бұзушылықтар үшін құқықтық тәртіп пен жазаның бұлтартпастығын қамтамасыз ету жөніндегі шараларды күшейтті. Біздің міндетіміз - әр адамның қауіпсіздігін қамтамасыз ету, оның құқықтары мен бостандықтарын қорғау, қоғамдағы құқықтық тәртіпті нығайтуға ықпал ету жөніндегі жұмысты тиімді ұйымдастыру", - деп атап өтті көліктегі полиция департаменті бастығының міндетін атқарушы Мадияр Айтуганов.

Оның айтуынша, ағымдағы жылдың 11 айында еліміздің әуе және теміржол көлігі объектілерінде түрлі әкімшілік құқық бұзушылықтар жасағаны үшін 80 813 құқық бұзушы жауапқа тартылған. Оның ішінде жалпы пайдалану орындарын ластағаны үшін 7 565, қоғамдық орындарда алкогольдік ішімдіктер ішкені үшін 6 360, белгіленбеген орындарда сауда жасағаны үшін 2 374, темекі шегуге тыйым салуды бұзғаны үшін 2 234, ұсақ бұзақылық үшін 677, әуе кемесінде жүріс-тұрыс ережелерін бұзғаны үшін 83 адам және т. б.

Сондай-ақ, Айтуганов "Мәскеу-Алматы" әуе рейсінің ұшуы бойынша әуежайда көлік полицейлері 30 жастағы ресейлік әйелді анықтап, ұстағанын хабарлады. Тексеру барысында жолаушы ұшу кезінде өзін дұрыс ұстамағаны, балағат сөздер айтқаны, ескертулерге жауап бермегені және ұшақ экипажының талаптарын орындамағаны анықталды.

"Әйел ұсақ бұзақылық жасағаны үшін, сондай - ақ әуе кемесіндегі тәртіп ережелерін бұзғаны үшін әкімшілік жауапкершілікке тартылды және 25 АЕК (92 300 теңге) айыппұл салынды", - деп түйіндеді полиция полковнигі.

Естеріңізге сала кетейік, көліктегі ПД қызметкерлері кез келген құқық бұзушылыққа "нөлдік төзімділік" қағидаты бойынша профилактикалық іс-шараларды тұрақты негізде жүргізеді