Қазақстан Ресейден бензин мен дизель отынын жеткізуді қайта бастайды

"Қоса беріліп отырған Қазақстан Республикасының Үкіметі мен Ресей Федерациясының Үкіметі арасындағы 2010 жылғы 9 желтоқсандағы Қазақстан Республикасына мұнай және мұнай өнімдерін жеткізу саласындағы сауда-экономикалық ынтымақтастық туралы Келісімнің қолданысын қалпына келтіру және оған өзгерістер енгізу туралы хаттаманың жобасы мақұлдансын", – делінген құжатта.

Энергетика министрлігі қазіргі уақытта келісімнің қолданысын ұзарту (жаңарту) рәсімдері жүргізіліп жатқанын, оның шеңберінде бажсыз жеткізу шарттарында ресейлік мұнай өнімдерін импорттау мүмкіндігі бар екенін түсіндірді.

Мәселен, Қазақстан мен Ресейдің энергетика министрліктері арасындағы индикативтік теңгерім шеңберінде 2024 жылы: автобензиндер – 285 мың тонна, авиаотын – 300 мың тонна, дизель отыны – 450 мың тонна, битум – тұтынудың ең жоғары кезеңдерінде (қажет болған жағдайда) 500 мың тонна импорттау мүмкіндігі көзделеді.

Жобаға енгізілген түзетулер тұжырымдамалық сипатта болады, ҚР ҰЭМ мен Қаржыминінің алдын ала ақпараты бойынша, осы редакцияда хаттама ратификацияланғанға дейін Ресей тарапы Қазақстанға ресейлік ЖЖМ жеткізу кезінде салықтар мен алымдарды қолдануы мүмкін.

2024 жылғы 17 қазанда Ресейдің ұсыныстарын ескере отырып, Келісімнің қолданысын қайта бастау туралы хаттама жобасын ҚР мүдделі мемлекеттік органдарымен (ИСМ, Қаржымині, ҰЭМ, СІМ, Әділетмині хаттамаларымен) келісу аяқталды.

Алайда кейінірек Ресей Федерациясынан жаңа ұсыныстар алынды.

Келісім 2028 жылғы 1 қаңтарға дейін күшінде болады деп көзделеді.

Құжат 5 желтоқсанға дейін жария талқылау үшін "Ашық НҚА" сайтында орналастырылған.