Қазақстандықтарға дәрігерлердің қателіктері үшін ақы төленетін болады: жаңа заң күшіне енді

Өзгерістерге сәйкес, жеке медициналық практикамен айналысатын медициналық ұйымдар мен жеке тұлға медицина қызметкерлерінің кәсіби жауапкершілігін сақтандыруға және құрамына 14 сақтандыру ұйымы кіретін бірыңғай сақтандыру пулымен сақтандыру шартын жасасуға міндетті болады.

"Сақтандыру төлемдері дәрігерлердің байқаусызда кәсіби қателіктерінен зардап шеккен пациентке төленетін болады. Науқасқа немесе оның жақын туыстарына (заңды өкілдеріне) өміріне және денсаулығына зиян келтіру және сақтандыру төлемін алу фактісін растау үшін денсаулық сақтау субъектісінің атына жүгіну қажет. Медициналық қызметті жүзеге асыру нәтижесінде пациенттің өмірі мен денсаулығына зиян келтіру фактісінің болуы (болмауы) туралы шешімді тәуелсіз сараптама комиссиясы қабылдайды", - деп түсіндірді агенттік.

Науқас Комиссия қорытындысының нәтижелерімен келіспеген жағдайда, ол денсаулық сақтау министрлігінің Медициналық және фармацевтикалық бақылау комитетіне немесе сотқа жүгінуге мүмкіндік алады.

"Заңда пациентке үшінші, екінші және бірінші топтағы мүгедектік анықталған жағдайда тиісінше 500, 600 және 800 АЕК (2024 жылы 1 846 000, 2 215 200 және 2 953 600 теңге); мүгедектігі бар бала үшін – 500 АЕК (2024 жылы 1 846 000 теңге ); өлімге әкеп соққан зиян үшін – 3 000 АЕК (2024 жылы 11 076 000 теңге); мүгедектік белгіленбей науқастың өмірі мен денсаулығына келтірілген зиян үшін – 300 АЕК-тен (2024 жылы 1 107 600 теңге) аспайды. Заңда сондай-ақ сақтандырылған медицина қызметкерлеріне адвокаттардың қызметтеріне ақы төлеуге жұмсалатын шығыстарды өтеу сомасы белгіленген, бұл денсаулық сақтау субъектісі төлеген сақтандыру сыйлықақысы сомасының 5 пайызынан аспайды", - делінген ведомствоның хабарламасында.