Экспорттық әлеует: Қазақстан бидайды қайда сата алады

Сауда министрлігінің өкілі хабарлағандай, жаһандық сұраныстың артуы және бірқатар елдердегі егіннің азаюы жағдайында Қазақстанға Италия, Латвия, Испания және басқа да Еуропалық Одақ мемлекеттерінің нарығы қызықты. Қазақстандық бидайды Ресей Федерациясының аумағы арқылы транзиттеу, сондай-ақ экспорттаушылардың көлік шығындарын арзандату мәселесін шешу маңызды.

"Түркия мен Таяу Шығыс елдеріне экспорттың әлеуеті миллион тоннаға жуық бидайды құрайды. Иран нарығына жеткізілімдерді қалпына келтіру маңызды, арпа бойынша біз қазір динамиканы көріп отырмыз, сауданы қаржыландыру және логистика мәселелері пысықталатын болады. Қазақстандық бидай брендін Пәкістан, Индонезия, Бразилия, Малайзия сияқты жаңа нарықтарда ілгерілету жөніндегі жұмыс жандандырылады, онда импорттың өсуі болжанады", - деді Төребаев Үкімет отырысында.

Оның айтуынша, Қазақстан Орталық Азия мен Ауғанстан елдерінің нарықтарына жеткізуді жалғастырады, бұл шамамен 4,2 миллион тонна.

"Жалпы алғанда, Қытайға астық экспорты 2023 жылы 1,4 миллион тоннадан асты, бұл жылына 5,5 есе өсті. Бидайдың Қытайға экспорты айтарлықтай өсті, 2023 жылы 538,8 мың тоннаға жетті, бұл өткен жылмен салыстырғанда 15 есе көп. Бұл Қытай мен Азия елдеріне 1,6 миллион тоннаға дейін бидай жеткізу мүмкіндігін көрсетеді. Қытай органдарының талаптарына байланысты шекарада кідіріс мәселесін, сондай-ақ Қытайдағы қазақстандық астық импортына лицензиялар мен квоталар сияқты күрделі шарттарды пысықтау маңызды", - деп толықтырды вице-министр.