Бектенов суды үнемді пайдалануға шақырды

Ол биылғы вегетациялық кезең су ресурстарының тапшылығынсыз өткенін атап өтті.

"Мемлекет басшысы халыққа Жолдауында экономиканың барлық салаларында, әсіресе ауыл шаруашылығында су үнемдеу технологияларын пайдаланудың маңыздылығын атап өтті. Біздің елімізде үлкен су ресурстары жоқ. Суды үнемді пайдалану, бұл мәселеде халықты ғана емес, ең алдымен бизнесті ынталандыру өте маңызды. Сондықтан өңірлердің су үнемдеу технологияларын қолдана отырып, алаңдарды ұлғайту бойынша индикаторларға қол жеткізуі маңызды", – деп толықтырды Олжас Бектенов.

Премьер-министр Үкіметте бұрын бекітілген жоспарлы индикаторларды төмендеткен облыстар бар екенін айтты. Бұл Жамбыл, Қарағанды және Атырау облыстары.

"Бірқатар өңірлер жоспарларын орындамады. Бұл Қостанай, Шығыс Қазақстан және Жетісу облыстары. Осы өңірлерге өз көрсеткіштерін қайта қарауды және оларды орындау бойынша тиісті шаралар қабылдауды тапсырамын. Қызылорда облысы белгіленген жоспарларды асыра орындады, дегенмен бұл аймақ дәстүрлі түрде суды ең көп тұтынатын болып саналады. Онда суарудың тиімділігі жақсарды, бұл судың едәуір көлемін үнемдеуге мүмкіндік берді. Бұл тәжірибені басқа аймақтар қолдануы керек. Бұл әсіресе вегетациялық кезеңде су тапшылығын сезінетін Қазақстанның оңтүстігіне қатысты", - деді Олжас Бектенов.

Ол суды үнемдейтін технологияларды қолдану және суды көп қажет ететін дақылдардың аумағын оңтайландыру бойынша барынша шаралар қабылдау керек деп санайды.

"Сонымен бірге су ресурстарын басқа өңірлерде де ұтымды пайдалану қажет. Сондай-ақ, вегетациялық кезеңде су бөлу бойынша көрші мемлекеттермен сапалы келіссөздер жүргізудің маңызы зор. Осы мәселелердің барлығы уәкілетті мемлекеттік органдар мен шекара маңы өңірлері әкімдіктерінің тұрақты бақылауында болуы тиіс", – деді министрлер кабинетінің басшысы.

Олжас Бектенов су ресурстары және ауыл шаруашылығы министрліктері өңірлерді сумен қамтамасыз ету жөніндегі іс-қимылдарды нақты үйлестіруді қамтамасыз етуі қажет деп мәлімдеді.

"Ең бастысы-келесі вегетациялық кезеңнің басына сапалы дайындық жүргізу, су қоймаларын толтыру және суару жүйелеріндегі су шығынын азайту бойынша жұмыстар жүргізу. Су ресурстарын тиімді пайдаланудың және оларды үнемдеудің, суармалы жерлердің көлемін ұлғайтудың барлық мәселелері су ресурстары және суару министрлігінің нақты үйлестіруін талап етеді. Сондықтан су ресурстары министрлігіне су үнемдеу технологияларына инвестиция салу кезінде аграршыларға су беру қызметтерінің құнын субсидиялау және шығындарды өтеу функцияларын бекіту қажет", - деп тапсырды Олжас Бектенов.

Ол сондай-ақ суармалы жерлерде су үнемдеу технологияларын енгізуді ынталандырудың жаңа тетіктерін әзірлеуді және судың цифрлық есебін белсенді қолдануды тапсырды. Оның айтуынша, жыл сайын су үнемдеу технологияларын қолдана отырып, суармалы жерлердің көлемін 150 мың гектарға дейін ұлғайту жұмыстарын жалғастыру қажет.