Тоқаев халықты газбен тұрақты қамтамасыз етуді тапсырды

Қасым-Жомарт Тоқаев Ұлттық компанияның 2024 жылғы 9 айдағы жұмыс қорытындысы бойынша есепті тыңдады.

Президентке ірі инвестициялық жобалардың іске асырылу барысы және транзиттік әлеуетті дамыту жөніндегі тапсырмалардың орындалуы туралы баяндалды.

Санжар Жаркешов хабарлағандай, "Алматы – Байсерке – Талғар" газ құбырының екінші желісінің және Алматыдағы ЖЭО-2 және ЖЭО-3 үшін газ инфрақұрылымының құрылысы аяқталды, "Талдықорған – Үшарал" жаңа магистральдық газ құбырының құрылысы басталды, Өзбекстанға газ транзитін ұлғайту үшін "САЦ" жүйесін жаңғырту бойынша дайындық жұмыстары жүргізілуде.

Мемлекет басшысына ресурстық базаны кеңейту жұмыстары туралы хабарланды. "QazaqGaz" ҰК " АҚ Басқарма төрағасы баяндағандай, Қазақстан экономикасында тауарлық газды тұтынудың қарқынды өсуін ескере отырып, газ саласының геологиялық барлау жобаларына шетелдік инвестициялар тартылды. Ақтөбе облысында геологиялық барлау бойынша Chevron компаниясымен 100% carry-қаржыландыру шарттарымен келісімге қол қойылды.

Қасым-Жомарт Тоқаевқа Жолдауда айтылған газ саласының инвестициялық тартымдылығын арттыру, газға барабар тарифтер мен көтерме бағаларды ұсыну жөніндегі міндеттерді іске асыру бойынша энергетика, Ұлттық экономика министрліктерімен бірлескен жұмыс туралы баяндалды.

Кездесу қорытындысы бойынша Президент жылыту кезеңінде халықты және экономиканы тұрақты газбен жабдықтауға, саланы одан әрі реформалауға және газ тасымалдау жүйесінің қуатын кеңейтуге бағытталған бірқатар тапсырмалар берді.