Қазақстанда Балаларды иммундауға 6 млрд теңге бөлінді

Үкімет резервінен бұрын Ұлттық егу күнтізбесі шеңберінде вакцинациялауды өткізіп алған 18 жасқа дейінгі балаларды иммундауға 5 832 377 600 (бес миллиард сегіз жүз отыз екі миллион үш жүз жетпіс жеті мың алты жүз) теңге бөлінеді, деп хабарлайды Премьер-Министрдің баспасөз қызметі.

Денсаулық сақтау министрлігі жүргізген талдау нәтижесінде Қазақстанда барлығы 800 мыңнан астам вакцинацияланбаған бала анықталды. Иммундау көкжөтел, дифтерия, А және В вирустық гепатиттері, қызылша, қызамық, сіреспе, полиомиелит, паротит және гемофильді инфекция сияқты қауіпті жұқпалы ауруларға қарсы жүргізіледі.

Қаражат облыстардың, республикалық маңызы бар қалалардың және астананың әкімдіктеріне 747 720 доза вакцина және 542 592 бірлік шприц сатып алуға берілетін ағымдағы нысаналы трансферттер түрінде бағытталатын болады. Бұл ретте Шығыс Қазақстан облысында балаларға вакцинациялауды қолда бар препараттар көлемі есебінен жүргізу жоспарлануда.

Денсаулық сақтау министрлігінің мәліметінше, Қазақстанда қызылша бойынша эпидемиологиялық жағдай тұрақтануда. Соңғы екі айда сырқаттанушылық деңгейі 32% - ға төмендеді. Қосымша жаппай иммундау шеңберінде шамамен 1,3 млн адам егілді, қамту вакцинациялауға жататын халықтың 91% -. құрады.

Сонымен қатар, басқа вакцинамен басқарылатын инфекциялармен сырқаттанушылықтың өсуі байқалады. Мәселен, 2023 жылы көкжөтел бойынша теріс динамика байқалды, бұл ретте науқастардың 91% – ы вакцинацияланбаған балалар. Өсу қызамық, паротит және А вирустық гепатитінде де болды.

Халық арасында қауіпті инфекциялармен сырқаттанушылықтың өсуіне жол бермеу үшін Үкімет басшысы Олжас Бектенов Денсаулық сақтау министрлігі мен әкімдіктерге иммундауды уақтылы жүргізу мәселесін және әрбір өңірдегі эпидемиологиялық жағдайды ерекше бақылауға алуды тапсырды.

Сәуір айының соңында Үкімет Кентау, Риддер және Қызылорда жылу көздерін жаңғыртуға шамамен 16 млрд теңге бөлді.