2024 жылы Қарағанды облысында мыңға жуық кезекте тұрғандар баспана алады

2023 жылдың қорытындысы бойынша 422,666 мың шаршы метр тұрғын үй пайдалануға берілді. Өткен жылы облыста 547 бюджеттік пәтер пайдалануға берілді, 347 жалға берілетін пәтер сатып алынды. Халықтың әлеуметтік осал топтары санатынан кезекте тұрғандарға беру үшін барлығы 894 пәтер салынды және сатып алынды.

"Өңірлер бөлінісінде мынадай жағдай қалыптасты. Өткен жылы Қарағандыдағы Белинский көшесіндегі үйдің құрылысы аяқталды. Балқашта 45 пәтерлі үй салынып, халықтың әлеуметтік осал топтары үшін 84 пәтер сатып алынды. Приозерск қаласында 45 пәтерлі үй іске қосылды, сондай-ақ халықтың әлеуметтік осал топтары үшін қосымша 60 пәтер сатып алынды",-деді Мұрат Мағзин.

Тұрғын үйдің белсенді құрылысы спутниктік қалаларда да жүргізілуде. Мәселен, Саран қаласында 115 пәтер (оның ішінде РТИ шағын ауданында 15 пәтер) пайдалануға берілді. Теміртауда жеке құрылыс салушы жаңа тұрғын үй салды, оны әкімдік сатып алып, халықтың әлеуметтік осал топтары үшін 65 пәтер берді. Шахтинск қаласында 72 пәтер сатып алынып, салынды.

Тұрғын үй құрылысы бағдарламасы облыстың ауыл тұрғындарын да жалға берілетін тұрғын үймен қамтамасыз етуге мүмкіндік берді. Мәселен, ауылдық аудандарда 2023 жылы облыстың барлық 7 ауылдық ауданында 350-ге жуық пәтер салынып, сатып алынды.

2024 жылы бюджеттен үш бағыт бойынша 8,3 миллиард теңге қарастырылған. Дайын жалға берілетін тұрғын үйді сатып алуға – 261 пәтерге 3,5 миллиард теңге, кредиттік тұрғын үй салуға-4,1 миллиард теңге, тұрғын үйлерге ақпараттық – коммуникациялық инфрақұрылым салуға-0,7 миллиард теңге жұмсалады.

"Жалға берілетін, кредиттік тұрғын үй салу және оны сатып алу есебінен мыңға жуық кезекте тұрғандарды шаршы метрмен қамтамасыз ету жоспарлануда. Тұрғын үй құрылысы мен сатып алу облыстың барлық өңірлерінде жүзеге асырылады", - деді Мұрат Мағзин.