Қазақстан Ресей Федерациясымен, Өзбекстанмен және Қырғызстанмен құрлық шекараларындағы шектеулерді алып тастайды

11 Сәуір, 202209:39

«Казинформ»

11 сәуірден бастап Қазақстан Ресей Федерациясымен, Өзбекстанмен және Қырғызстанмен құрлықтағы шекаралардағы ковидтік шектеулерді алып тастайды, деп хабарлайды ҚазАқпарат primeminister.kz.

Бүгін Премьер-Министрдің орынбасары Ералы Тоғжановтың төрағалығымен Қазақстан Республикасының аумағында коронавирустық инфекцияны болдырмау және тарату жөніндегі ведомствоаралық комиссияның отырысы өтті. Комиссия жұмысына мемлекеттік органдардың, "Атамекен" ҰКП өкілдері мен өңірлердің басшылары қатысты.

Эпидемиологиялық жағдайдың тұрақтануын ескере отырып, ҚР аумағында коронавирустық инфекцияның таралуына жол бермеу жөніндегі ведомствоаралық комиссия ағымдағы жылдың 11 сәуірінен бастап Ресей Федерациясымен, Өзбекстан және Қырғызстан республикаларымен құрлықтағы өткізу пункттерінде ҚР азаматтарының, азаматтығы жоқ адамдардың және шетелдіктердің Қазақстан Республикасының Мемлекеттік шекарасынан өтуі бойынша шектеулерді алып тастау туралы шешім қабылдады.

Сондай-ақ, ҚР Мемлекеттік шекарасын әуе қатынасымен кесіп өту бойынша барлық шектеулер алынып тасталады.

Бұл ретте ПТР әдісімен COVID-19-ға зерттеудің теріс нәтижесі бар анықтаманы немесе вакцинацияның толық курсынан өткені туралы құжатты/паспортты, Қазақстан Республикасының аумағында тұруға ықтиярхаты бар қазақстандықтар мен шетелдіктерге және вакцинация паспорттарын өзара тану болған кезде шетелдік азаматтарға covid-19-ға қарсы ревакцинацияны міндетті түрде ұсыну талабы сақталады.

Вице-премьер өз сөзінде мемлекеттік шекараны ашу мәселесі Мемлекет басшысының тұрақты жеке бақылауында екенін атап өтті.

Отырыс соңында Е. Тоғжанов әкімдіктерге коронавирустық инфекцияға қарсы егу науқанын ерекше бақылауға алуды тапсырды және халық арасында сапалы түсіндіру жұмыстарының қажеттігін атап өтті.