Балаларды клубтар мен барларға жібергені үшін 2 мыңға жуық кәсіпкер жазаланды

Өмірлік қиын жағдайға тап болған отбасыларға мыңнан астам іс қозғалды. Мұндай отбасыларға материалдық және психологиялық көмектен бастап заңгерлік және медициналық көмекке дейін кешенді қолдау көрсетіледі, сондай-ақ балаларды жұмысқа орналастыруға, емдеуге және оқытуға жәрдемдеседі.

Бүгінде елімізде балалардың құқықтарын қорғау жөніндегі мемлекеттік органдардың жұмысын, құқық бұзушылықтардың алдын алу және отбасыларды қолдау мәселелерін үйлестіретін 271 комиссия жұмыс істейді. Комиссиялар жоспарлы мәселелерді ғана емес, жедел ден қоюды талап ететін резонанстық жағдайларды да қарайды.

"Кәмелетке толмағандар істері жөніндегі комиссиялар — бұл балалардың құқықтарын қорғаудың негізгі құралы. Олардың қызметі дағдарысқа ұшыраған отбасыларды жедел анықтауға және оларға атаулы көмек көрсетуге мүмкіндік береді. Біз ведомствоаралық өзара іс — қимылды күшейтеміз және балалар арасында буллинг, кибербуллинг және суицидтік мінез-құлықтың алдын алуға бағытталған жаңа тәсілдерді енгіземіз", - деп атап өтті ҚР Білім министрлігі Балалардың құқықтарын қорғау Комитетінің төрағасы Насымжан Оспанова.

Құқық қорғау органдарымен бірлесіп жүргізілген ведомствоаралық рейдтер шеңберінде тәрбиелеу жөніндегі міндеттерді орындамағаны үшін 21,8 мыңнан астам ата — ана, түнде балалардың үйден тыс жерде болғаны үшін 107 мыңнан астам заңды өкіл және кәмелетке толмағандарды ойын — сауық орындарына жібергені үшін 2 мыңға жуық кәсіпкер әкімшілік жауапкершілікке тартылды.

Қазіргі уақытта комиссиялар қызметінің буллинг, кибербуллинг және суицидтік мінез-құлықтың алдын алу, зерттеулер жүргізу және өңірлерге әдістемелік көмек көрсету саласындағы өкілеттіктерін кеңейтуді көздейтін жаңа қағидалары әзірленуде. Жаңартылған формат жергілікті жерлерде жұмыстың тиімділігі мен жауапкершілігін арттыруға мүмкіндік береді.