Қарызы аз салық төлеушілер төлемдер бойынша кейінге қалдыруды ала алады-ҚР Қаржы министрлігі

"Жаңа Салық кодексінде салық міндеттемелерін орындау мерзімдерінің өзгеруіне байланысты түзетулер бар. Салық міндеттемелерінің көлемі 1,5 мың айлық есептік көрсеткішке (5,8 млн теңге) жетпейтін салық төлеушілерге міндеттемелердің мерзімін кепілсіз өзгертуге рұқсат етіледі. Басқаша айтқанда, қарызы 5,8 миллион теңгеге жетпейтін салық төлеушілер кепіл бермей төлем мерзімін өзгерте алады", - деді А.Есқалиева ведомствоның Instagram парақшасында.

Қолданыстағы Салық кодексіне сәйкес салық міндеттемелерін орындау мерзімін өзгерту үшін міндетті түрде мүліктік кепіл немесе банктік кепілдік беру қажет.

"Кепілсіз төлеу мерзімін өзгерту құқығын пайдаланғысы келетін салық төлеушіде кейінге қалдырылған басқа төленбеген салық қарыздары болмауы керек. Салық төлеушіге салық органдарынан төленбеген салықтар туралы міндетті хабарлама болмауы қажет. Салық төлеушінің кәсіпкерлік қызметі тоқтатылмауы тиіс", - деп түсіндірді А.Есқалиева.

Егер қолданыстағы Кодекске сәйкес соңғы 3 жыл ішінде төлемдерді кейінге қалдыруға рұқсат алған және төлем кестесін бұзған салық төлеуші рұқсатынан айырылса, онда жаңа кодексте бұл мерзім 2 жыл болып белгіленеді. 2026 жылдан бастап мұндай өтініштерді қарау мерзімі 20 жұмыс күнінен 10 жұмыс күніне дейін қысқарады.

Уақытша қаржылық қиындықтарға тап болған салық төлеушілер үшін салық міндеттемесін орындау мерзімін өзгертудің екі нысаны қарастырылғанын атап өткен жөн: біржолғы төлемді алты айға дейін кейінге қалдыру және төлеу мерзімі үш айдан үш жылға дейін бөліп төлеу.